Times of Maharashtra Desk, Mumbai: राज्यातील बृहन्मुंबई महानगरपालिकेसह एकूण २९ महानगरपालिकांच्या सार्वत्रिक निवडणुका १५ जानेवारी २०२६ रोजी होणार असून, यासाठी कालपासून संबंधित सर्व महापालिका क्षेत्रांत आचारसंहिता लागू करण्यात आली आहे. या निवडणुकांमध्ये एकूण २ हजार ८६९ जागांसाठी मतदान होणार आहे, अशी माहिती राज्य निवडणूक आयोगाने दिली आहे.
बृहन्मुंबई महानगरपालिका निवडणुकीची अधिसूचना १६ डिसेंबर २०२५ रोजी, तर उर्वरित २८ महानगरपालिकांची अधिसूचना १८ डिसेंबर २०२५ रोजी प्रसिद्ध करण्यात येणार आहे. बृहन्मुंबई वगळता अन्य सर्व २८ महानगरपालिकांच्या निवडणुका बहुसदस्यीय प्रभाग पद्धतीने होणार आहेत.
या निवडणूक प्रक्रियेसाठी सुमारे २९० निवडणूक निर्णय अधिकारी, ८७० सहायक निवडणूक निर्णय अधिकारी तसेच जवळपास १ लाख ९६ हजार ६०५ निवडणूक अधिकारी व कर्मचारी नियुक्त करण्यात येणार आहेत.
उमेदवारांसाठी खर्च मर्यादा
निवडणूक आयोगाने उमेदवारांच्या प्रचार खर्चावर मर्यादा निश्चित केली असून,
बृहन्मुंबई तसेच ‘अ’ वर्ग महानगरपालिका (पुणे, नागपूर) – १५ लाख रुपये
‘ब’ वर्ग महानगरपालिका (पिंपरी-चिंचवड, नाशिक, ठाणे) – १३ लाख रुपये
‘क’ वर्ग महानगरपालिका (कल्याण-डोंबिवली, नवी मुंबई, छत्रपती संभाजीनगर, वसई-विरार) – ११ लाख रुपये
‘ड’ वर्ग महानगरपालिका (उर्वरित सर्व) १९ – ९ लाख रुपये इतकी खर्च मर्यादा ठेवण्यात आली आहे.
महत्वाच्या तारखा
नामनिर्देशनपत्र दाखल करणे
२३ डिसेंबर ते ३० डिसेंबर २०२५
नामनिर्देशनपत्रांची छाननी
३१ डिसेंबर २०२५
उमेदवारी माघारीची अंतिम मुदत
०२ जानेवारी २०२६
निवडणूक चिन्ह वाटप व अंतिम यादी
०३ जानेवारी २०२६
मतदान
१५ जानेवारी २०२६
मतमोजणी
१६ जानेवारी २०२६
महापालिका निवडणुकांमुळे राज्यातील राजकीय वातावरण तापणार असून, मुंबईसह सर्व प्रमुख शहरांमध्ये प्रचाराला लवकरच वेग येण्याची शक्यता आहे.
