Times of Maharashtra Desk, Pune: राज्यातील महापालिका निवडणुका २०२६ चा कार्यक्रम आज राज्य निवडणूक आयोगाने अधिकृतरीत्या जाहीर केला आहे. सह्याद्री अतिथीगृह, मुंबई येथे आयोजित पत्रकार परिषदेत आयोगाने सांगितले की २९ महानगरपालिका निवडणुका १५ जानेवारी २०२६ रोजी मतदान होऊन १६ जानेवारी रोजी मतमोजणी व निकाल जाहीर केला जाईल. या निवडणुकांसाठी आजपासून आचारसंहिता लागू करण्यात आली आहे आणि एकूण २८६९ जागांसाठी लढत होणार आहे, ज्यापैकी १४४२ जागा महिलांसाठी राखीव आहेत.
राज्यातील महापालिका निवडणुकीच्या प्रक्रियेसाठी उमेदवारी अर्ज २३ ते ३० डिसेंबर २०२५ दरम्यान स्वीकारले जातील, त्यानंतर ३१ डिसेंबर रोजी अर्जांची छाननी केली जाईल. उमेदवारांना २ जानेवारी २०२६ पर्यंत मागे घेता येणार तसेच ३ जानेवारी २०२६ रोजी अंतिम उमेदवारांची यादी जाहीर केली जाणार आहे. मतदार यादी १ जुलै २०२५ पर्यंत अद्ययावत झालेली वापरण्यात येणार असून, उमेदवारांनी ऑफलाइन अर्ज सादर करणे आवश्यक आहे.
मुंबई महानगरपालिका निवडणुकीसाठी १०,१११ मतदान केंद्रे निश्चित करण्यात आली आहेत आणि मतदान इव्हीएम मशिनद्वारे होणार आहे. यामध्ये उमेदवारांना जात प्रमाणपत्र आणि जात वैधता प्रमाणपत्र सादर करणे अनिवार्य राहील आणि ज्यांच्याकडे ते नसेल त्यांना सहा महिन्यांमध्ये ते सादर करावे लागणार आहे.
या निवडणुकांमुळे राज्यातील राजकीय वातावरणही तापणार आहे. विविध पक्षांनी युती व उमेदवार यादींद्वारे आपले राजकीय समीकरण बदलण्याची तयारी सुरू केली आहे, त्यात मुंबई आणि पुण्यासारख्या प्रमुख महानगरपालिकांतील राजकीय स्पर्धा विशेष लक्षात येत आहे. राजकीय पक्षांनी मतदारांपर्यंत आपले संदेश पोहोचवण्याचे कामही जोरात सुरु केले आहे.
कसे असेल निवडणुकीचे वेळापत्रक?
मतदार अर्ज स्वीकारण्याची तारीख
२३ डिसेंबर २०२५ — ३० डिसेंबर २०२५ पर्यंत
अर्जांची छाननी
३१ डिसेंबर २०२५
उमेदवारी अर्ज मागे घेण्याची शेवटची तारीख
२ जानेवारी २०२६
अंतिम उमेदवार यादी प्रकाशित
३ जानेवारी २०२६
मतदान दिनांक
१५ जानेवारी २०२६
मतमोजणी व निकाल
१६ जानेवारी २०२६
मतदार सूची
१ जुलै २०२५ ची मतदार यादी वापरण्यात येणार आहे.
