दौंड (प्रतिनिधी संघराज गायकवाड): शहरातील संविधान चौक येथे मुस्लिम समाजाच्या शेकडो नागरिकांनी एकत्र येत अहिल्यानगरचे आमदार संग्राम जगताप यांच्या वादग्रस्त विधानाचा तीव्र शब्दांत निषेध केला. शांततेच्या मार्गाने, संविधान चौकात उभं राहत समाजाने आपल्या भावना व्यक्त केल्या.
दुपारी सुरू झालेल्या या आंदोलनात नागरिकांनी “जाहीर निषेध” अशा घोषणा देत, संबंधित विधानाचा निषेध नोंदवला. आंदोलनस्थळी आंबेडकर पुतळा आणि संविधान शिलालेखासमोर निषेध आंदोलनाचे स्वरूप अधिक अर्थपूर्ण ठरले.
संग्राम जगताप यांनी काही दिवसांपूर्वी सार्वजनिक कार्यक्रमात मुस्लिम समाजाबद्दल अपमानास्पद आणि वादग्रस्त विधान केल्याचा आरोप करण्यात आला आहे. त्यामुळे मुस्लिम बांधवांत संतापाची भावना असून, त्यांनी निषेध करत सरकारकडून तात्काळ माफी मागण्याची किंवा योग्य ती कारवाई करण्याची मागणी केली आहे.
प्रदर्शन करणाऱ्यांनी म्हटलं की, “आम्ही संविधानावर विश्वास ठेवणारे नागरिक आहोत. कोणत्याही नेत्याने समाजात फूट पाडणारे वक्तव्य करू नये. अशा वक्तव्यांना विरोध करणं हा आमचा हक्क आहे.”
पोलीस निरीक्षकांच्या देखरेखीखाली बंदोबस्त ठेवण्यात आला होता. संपूर्ण निषेध आंदोलन अत्यंत शांततेत आणि शिस्तीत पार पडलं.
