Times Of Maharashtra Desk : बोरीवली–दहिसर परिसरात सुरू असलेल्या अतिक्रमणविरोधी कारवाईवरून महाराष्ट्र नवनिर्माण सेनेनं (मनसे) प्रशासनाविरोधात तीव्र नाराजी व्यक्त केली आहे. कारवाई करताना केवळ मराठी व्यापारी आणि फेरीवाल्यांनाच लक्ष्य केलं जात असून, इतर परप्रांतिय फेरीवाल्यांकडे जाणीवपूर्वक दुर्लक्ष केलं जात असल्याचा गंभीर आरोप मनसेकडून करण्यात आला आहे. या कथित भेदभावाविरोधात मनसे कार्यकर्त्यांनी मुंबई महानगरपालिकेच्या आर – मध्य प्रभाग कार्यालयात धडक देत प्रशासनाला जाब विचारला.
मनसेच्या वतीने आर-मध्य प्रभागातील सहाय्यक अभियंता कार्यालयात अधिकाऱ्यांची भेट घेण्यात आली. यावेळी प्रशासनाला निवेदन देत अतिक्रमणविरोधी कारवाईत दुजाभाव केला जात असल्याचा मुद्दा ठामपणे मांडण्यात आला. फक्त मराठी व्यापाऱ्यांवरच कारवाई केली जात असून, परप्रांतिय व्यापाऱ्यांना संरक्षण दिलं जात असल्याचा आरोप मनसे नेत्यांनी केला.
कारवाई करताना नियम सर्वांसाठी समान असावेत – मनसे
या आंदोलनावेळी मनसे नेते कुणाल माईनकर आणि उपविभाग प्रमुख किरण नकाशे यांनी आक्रमक भूमिका घेत प्रशासनाला स्पष्ट शब्दांत इशारा दिला. कारवाई करताना नियम सर्वांसाठी समान असावेत, कोणताही दुजाभाव चालणार नाही, अशी ठाम मागणी त्यांनी केली. अतिक्रमण हटवायचं असेल, तर ते सर्व फेरीवाल्यांवर एकसारखं झालं पाहिजे. फक्त मराठी व्यापाऱ्यांना लक्ष्य करणं अन्यायकारक असून ते आम्ही खपवून घेणार नाही, असं मनसे नेत्यांनी सांगितलं.
मनसेकडून अमराठी व परप्रांतिय फेरीवाल्यांवरही तात्काळ आणि समान कारवाई करण्यात यावी, अशी मागणी करण्यात आली आहे. अन्यथा मनसे स्टाईलने तीव्र आंदोलन छेडलं जाईल, असा थेट इशाराही प्रशासनाला देण्यात आला.
प्रशासनाकडून दखल घेण्याचं आश्वासन
मनसेने दिलेल्या निवेदनानंतर प्रशासनाकडून योग्य ती दखल घेतली जाईल आणि नियमांनुसार कारवाई केली जाईल, असे आश्वासन अधिकाऱ्यांकडून देण्यात आल्याची माहिती मनसेकडून देण्यात आली आहे. मात्र, प्रत्यक्षात समान कारवाई होत नाही तोपर्यंत मनसेची भूमिका आक्रमकच राहील, असंही पक्षाकडून स्पष्ट करण्यात आलं आहे.
या प्रकारामुळे बोरीवली–दहिसर परिसरातील फेरीवाला कारवाईचा मुद्दा पुन्हा एकदा चर्चेत आला असून, प्रशासनाची पुढील भूमिका काय असते, याकडे सर्वांचे लक्ष लागले आहे.
