Times of Maharashtra Desk: आगामी मुंबई महापालिका निवडणुकीसाठी मनसेप्रमुख राज ठाकरे यांनी उमेदवारांची तयारी जोरात सुरु केली आहे. याच पार्श्वभूमीवर मुंबईत मनसेचे नेते यशवंत किल्लेदार यांना पहिला एबी फॉर्म देण्यात आला. स्वतः राज ठाकरेंनी हा फॉर्म यशवंत किल्लेदार यांना दिला. या सोहळ्यास मनसेचे इतर नेते बाळा नांदगांवकर, नितीन सरदेसाई, संदीप देशपांडे आणि अविनाश अभ्यंकर उपस्थित होते.
यशवंत किल्लेदार हे वॉर्ड क्रमांक 192 मधून उमेदवारी दाखल करणार आहेत. एबी फॉर्म मिळाल्यानंतर यशवंत किल्लेदार भावूक झाले आणि म्हणाले, “माझ्यासाठी ही भावनिक आणि आनंदाची गोष्ट आहे. बऱ्याच वर्षांच्या प्रतीक्षेनंतर ही पोचपावती मिळाली. कंठ दाटून आला आहे.”
ठाकरे गटाची नाराजी ..
दरम्यान, मनसे आणि शिवसेना ठाकरे गटाच्या युतीत वॉर्ड क्रमांक 192 ची जागा मनसेला मिळाल्याने ठाकरे गटाचे इच्छुक उमेदवार प्रकाश पाटणकर नाराज झाले आहेत. त्यामुळे यशवंत किल्लेदार यांना उमेदवारी मिळाल्यानंतर प्रकाश पाटणकर शिवसेना शिंदे गटात जाण्याची शक्यता आहे. यामुळे मनसे-ठाकरे गटाच्या युतीमध्ये बंडखोरीचा धोका निर्माण होऊ शकतो.
मुंबई महापालिकेत एकूण 227 जागांसाठी निवडणूक पार पडणार असून, बहुमत मिळवण्यासाठी 114 जागा आवश्यक आहेत. राज ठाकरे आणि उद्धव ठाकरे यांनी 24 डिसेंबर 2025 रोजी ऐतिहासिक युतीची घोषणा केली होती. त्यामुळे मुंबईच्या राजकारणात नवे समीकरण तयार झाले आहे.
भाजप आणि एकनाथ शिंदे यांच्या महायुती विरुद्ध ठाकरे बंधूंच्या युतीत थेट सामना रंगणार असून, कोणाला बहुमत मिळेल हे पाहणे महत्त्वाचे ठरणार आहे. मुंबईसह राज्यातील सर्व महापालिकांमध्ये मतदान 15 जानेवारी 2026 रोजी होणार असून, मतमोजणी 16 जानेवारी 2026 रोजी होईल.
