बदनापूर (प्रतिनिधी सय्यद नजाकत) : समृद्धी महामार्गावर अपघातांची मालिका सुरूच असताना आज बुधवारी सकाळी साडेनऊच्या सुमारास बदनापूर पोलीस ठाण्याच्या हद्दीत भीषण अपघात घडला. एका खाजगी ट्रॅव्हल्स बसने ओव्हरटेक करण्याच्या प्रयत्नात आयशर टेम्पोला पाठीमागून जोरदार धडक दिली. या अपघातात २ प्रवासी गंभीर जखमी झाले असून ४ जण किरकोळ जखमी झाले आहेत.
मिळालेल्या माहितीनुसार, नागपूर कॉरिडॉरवरील चॅनल क्रमांक ३७७.४ जवळ ‘हर्ष ट्रॅव्हल्स’ (क्र. AR 11 C 0306) ही बस समोरून जाणाऱ्या आयशर टेम्पोला (क्र. MH 03 CV 3101) ओव्हरटेक करत होती. मात्र, यावेळी चालकाचे वाहनावरील नियंत्रण सुटल्याने बसने टेम्पोला मागून जोरात धडक दिली. या धडकेत ट्रॅव्हल्सच्या समोरील भागाचे मोठे नुकसान झाले.
या अपघातात ट्रॅव्हल्स चालक अंकित कुशवाह (वय 31) आणि शौर्य पवन सिंग (वय 9) हे दोघे गंभीर जखमी झाले आहेत. तर मेघा लक्ष्मण पांडे (वय 26, रा. रेवतीपुर, उत्तर प्रदेश), खुशी चंद्रमोहन पांडे, नीलम पवन सिंग (वय 30) आणि पूर्वी पवन सिंग (वय 4) हे किरकोळ जखमी झाले आहेत.
घटनेची माहिती मिळताच समृद्धी कंट्रोल रूमने तातडीने बदनापूर पोलिसांना कळवले. पोलीस उपनिरीक्षक काळे, वसंत राठोड, तसेच कर्मचारी केदारे, जयलाल सुंदरडे आणि MSF चे जवान घटनास्थळी दाखल झाले. त्यांनी तत्परता दाखवत सर्व जखमींना रुग्णवाहिकेद्वारे जालना येथील शासकीय रुग्णालयात उपचारासाठी दाखल केले.
अपघाताच्या वेळी बसमध्ये एकूण ४९ प्रवासी होते. जखमी वगळता उर्वरित ४३ प्रवासी सुरक्षित असून त्यांना पर्यायी वाहनाची व्यवस्था करून पुढील प्रवासासाठी रवाना करण्यात आले. दरम्यान, क्रेनच्या सहाय्याने अपघातग्रस्त वाहने बाजूला करून महामार्गावरील वाहतूक सुरळीत करण्यात आली.
