भूजच्या मंडईत लावणी कार्यक्रमाला रसिकांची दाद; कॉम्रेड विनोद झोडगे यांच्या हस्ते उद्घाटन
ब्रम्हपुरी / प्रतिनिधी रुपेश देशमुख: तालुक्यातील मौजा भूज (पद्मापूर) येथे मंडईनिमित्त नवतरुण कला मंडळ, भूज यांच्या वतीने आयोजित “मुजरा माझ्या लावणीचा” हा सांस्कृतिक कार्यक्रम मोठ्या उत्साहात पार पडला. या कार्यक्रमाचे उद्घाटन भारतीय कम्युनिस्ट पक्षाचे लढाऊ नेते कॉम्रेड विनोद झोडगे यांच्या हस्ते संपन्न झाले. या कार्यक्रमाला परिसरातील नागरिकांनी मोठी गर्दी करत उत्स्फूर्त प्रतिसाद दिला.
कार्यक्रमाच्या अध्यक्षस्थानी भाजपचे युवा नेते तनय देशकर होते. तर सहउद्घाटक म्हणून वांद्रा येथील उपसरपंच गुरुदेव वाघरे आणि प्रा. सुयोग बालबुद्धे उपस्थित होते. याप्रसंगी मंचावर प्रमुख अतिथी म्हणून उपाध्यक्ष तथा उपसरपंच सुरेश ठिकरे, माजी सरपंच मोरेश्वर पाटील झोडे, सत्कारमूर्ती नानेश्वर दिवटे, सरपंच शालूताई रामटेके, पोलीस पाटील देवानंद झोडे, विलास गहाने, नंदूजी म्हस्के सर, माणिक पाटील थेरकर, पुंडलिक पाटील झोडे, गणेश वाघरे, वांद्रा येथील माजी उपसरपंच बाबुराव सातपुते, सुधीर पाटील खेवले, इंजिनिअर अविनाश म्हस्के, चंद्रभान खनखापरे, मुखरु पाटील झोडे आदी मान्यवरांची उपस्थिती होती.
लावणी ही महाराष्ट्राची शान: विनोद झोडगे उद्घाटनप्रसंगी उपस्थितांना संबोधित करताना कॉम्रेड विनोद झोडगे यांनी लोककलेचे महत्त्व विषद केले. ते म्हणाले की, “लावणी ही आपल्या महाराष्ट्राची आण, बाण आणि शान असून ती संस्कृतीचा अविभाज्य भाग आहे. ही लोककला आणि आपली परंपरा जतन करणे हे प्रत्येकाचे कर्तव्य आहे. अशा सांस्कृतिक कार्यक्रमांच्या माध्यमातून केवळ मनोरंजनच होत नाही, तर स्थानिक कलाकारांना हक्काचे व्यासपीठ मिळते आणि त्यांच्या कलागुणांना चालना मिळते.” तसेच, अशा कार्यक्रमांतून सामाजिक एकात्मता वृद्धिंगत होते, त्यामुळे सर्वांनी अशा उपक्रमांना पाठिंबा द्यावा, असे आवाहनही त्यांनी केले.
मंडईनिमित्त आयोजित या लावणीच्या कार्यक्रमाचा भूज आणि पंचक्रोशीतील नागरिकांनी मनमुराद आनंद लुटला. कार्यक्रमाच्या यशस्वीतेसाठी नवतरुण कला मंडळ, भूजच्या सर्व सदस्यांनी अथक परिश्रम घेतले.
