विनोद पवार (जळगाव प्रतिनिधी) : चोपडा : महाशिवरात्रीच्या पावन पर्वानिमित्त चोपडा शहरात यंदा एक आगळावेगळा आणि पर्यावरणपूरक उपक्रम साकारण्यात आला आहे. तब्बल २१,१११ कच्च्या केळ्यांपासून तब्बल १८ फूट उंच भव्य शिवलिंग उभारण्यात आले असून या अभिनव संकल्पनेने संपूर्ण शहराचे लक्ष वेधून घेतले आहे. श्रद्धा, सृजनशीलता आणि पर्यावरणपूरकता यांचा संगम साधणाऱ्या या उपक्रमामुळे परिसरात भक्तिमय वातावरण निर्माण झाले आहे.
यावल रोडवरील प्रभु चिंतन भवन, ओम शांतीनगर येथे उभारण्यात आलेल्या या महाशिवलिंगासाठी स्वयंसेवकांनी अनेक दिवस परिश्रम घेतले. प्रत्येक केळे काळजीपूर्वक आणि संतुलित रचनेत बसवून शिवलिंगाला आकर्षक व भव्य स्वरूप देण्यात आले आहे. कृत्रिम साहित्य टाळून नैसर्गिक फळांचा वापर करण्यात आल्यामुळे हा उपक्रम पर्यावरण संरक्षणाचा संदेशही देत आहे.
भाविकांसाठी दररोज सकाळी ७ ते रात्री ८ वाजेपर्यंत दर्शनाची व्यवस्था करण्यात आली आहे. सकाळी ९:३० वाजता आणि सायंकाळी ७ वाजता महाआरती, मंत्रोच्चार, घंटानाद आणि सामूहिक प्रार्थना आयोजित केली जाते. आरतीच्या वेळी संपूर्ण परिसर भक्तिभावाने भारावून जात असून अनेक भाविक आध्यात्मिक शांतीचा अनुभव घेत आहेत.
या उपक्रमाच्या निमित्ताने आध्यात्मिक चित्रप्रदर्शनाचेही आयोजन करण्यात आले आहे. शिवतत्त्व, कर्मसिद्धांत, आत्मा-परमात्म्याचे नाते आणि जीवनमूल्ये यांविषयी मार्गदर्शन केले जात आहे. विशेषतः तरुण पिढीमध्ये सकारात्मक विचारसरणी आणि अध्यात्माची गोडी निर्माण व्हावी, हा या उपक्रमामागील मुख्य उद्देश असल्याचे आयोजकांनी सांगितले.
महाशिवरात्रीच्या पवित्र पर्वावर साकारलेला हा अनोखा उपक्रम नागरिकांसाठी श्रद्धा, ऊर्जा आणि आत्मिक समाधानाचा स्रोत ठरत आहे. दररोज मोठ्या संख्येने भाविक उपस्थित राहून दर्शनाचा लाभ घेत असून चोपडा शहरात या उपक्रमाची सर्वत्र चर्चा रंगली आहे.
