Times of Maharashtra Desk: नाशिक महापालिका निवडणुकीसाठी उमेदवारी अर्ज भरण्याचा आज शेवटचा दिवस असून, त्यातच भाजपच्या तिकीट वाटपावरून नाशिकमध्ये मोठा राजकीय थरार पाहायला मिळत आहे. भाजपकडून उमेदवारी मिळवण्यासाठी इच्छुक उमेदवारांची धावपळ सुरू असतानाच, एबी फॉर्म घेऊन जाणाऱ्या गाड्यांचा थेट रस्त्यावर पाठलाग झाल्याची घटना समोर आली आहे.
नाशिक शहराध्यक्ष सुनील केदार यांच्या गाडीचा काही इच्छुक उमेदवारांनी पाठलाग केल्याची माहिती आहे. या ताफ्यात आमदार राहुल ढिकले आणि आमदार सीमा हिरे यांचाही समावेश असल्याचे समजते. पंचवटी आणि नवीन सिडको परिसरातील इच्छुक उमेदवार आपल्याला उमेदवारी मिळावी, या मागणीसाठी एबी फॉर्म घेऊन जाणाऱ्या वाहनांचा पाठलाग करत असल्याने नाशिक-मुंबई महामार्गावर सुमारे अर्धा ते एक तास राजकीय गोंधळाचे वातावरण निर्माण झाले होते.
गेल्या काही दिवसांपासून भाजपमधील निष्ठावंत कार्यकर्ते तिकिटांची मागणी करत होते. मात्र, ऐनवेळी काही नवीन चेहऱ्यांना तिकीट दिले जात असल्याने पक्षांतर्गत नाराजी उफाळून आली आहे. या प्रकारामुळे भाजपच्या तिकीट वाटपातील गोंधळ उघड झाला असून, नाशिकमधील महापालिका निवडणूक चांगलीच चर्चेत आली आहे.
दरम्यान, भाजपकडून आणखी एक वादग्रस्त निर्णय समोर आला आहे. धोत्रे खून प्रकरणातील आरोपी आणि सध्या कारागृहात असलेले भाजपचे माजी नगरसेवक उद्धव निमसे यांचे पुत्र रिद्धीश निमसे यांना भाजपकडून महापालिका निवडणुकीसाठी उमेदवारी जाहीर करण्यात आली आहे. संबंधित प्रभागातील राजकीय समीकरणे आणि पक्षीय ताकद लक्षात घेऊन हा निर्णय घेतल्याचे सांगितले जात आहे.
उमेदवारी जाहीर झाल्यानंतर रिद्धीश निमसे यांनी माध्यमांशी बोलताना, “विकासाच्या मुद्द्यावर जनता आमच्यासोबत आहे. त्यामुळे आगामी निवडणुकीत आम्हाला निश्चितच विजय मिळेल,” असा विश्वास व्यक्त केला. तिकीट वाटपावरून सुरू असलेल्या या घडामोडींमुळे नाशिक महापालिका निवडणूक 2026 अधिकच रंगतदार ठरत असल्याचे चित्र आहे.
