Times of Maharashtra Desk, Pune : रिक्षाला कट मारल्याचा जाब विचारल्याच्या कारणावरून अजंठानगर, चिंचवड येथे एका तरुणाच्या डोक्यात आणि हातावर कोयत्याने वार करण्यात आले. हल्लेखोराने ‘मी येथील भाई आहे, माझ्यावर दोन हाफमर्डरच्या केस चालू आहेत’ असे बोलून परिसरात दहशत निर्माण केली.
याप्रकरणी विशाल सुरेश शिंदे वय वर्षे २५, रा. मोरेवस्ती, चिखली यांनी निगडी पोलीस ठाण्यात फिर्याद दिली आहे. त्यानुसार आकाश विश्वंबर गायकवाड वय वर्षे ३१, रा. अजंठानगर, चिंचवड आणि दिगंबर विश्वंबर गायकवाड वय वर्षे ३५, रा. अजंठानगर, चिंचवड या दोघांना अटक करण्यात आली आहे.
पोलिसांनी दिलेल्या माहितीनुसार, फिर्यादी विशाल शिंदे हे त्यांच्या मित्रासोबत रस्त्यावर गप्पा मारत असताना आरोपी आकाश गायकवाड याने रिक्षाने त्यांना कट मारला. विशाल यांनी याबद्दल जाब विचारला असता, याचा राग येऊन आरोपी आकाश याने त्यांच्या डोक्यात व हातावर कोयत्याने वार केले. यावेळी दुसरा आरोपी दिगंबर गायकवाड याने हातात कोयता घेऊन तो हवेत फिरवला आणि ‘मी येथील भाई आहे, माझ्यावर दोन हाफमर्डरच्या केस चालू आहेत. माझ्यामध्ये कोणीही आले तर मी त्यास सोडणार नाही,’ असे बोलून परिसरात भीतीचे वातावरण निर्माण केले.
घटनेचा पुढील तपास निगडी पोलीस करत आहेत.
