विकास चव्हाण (अहिल्यानगर प्रतिनिधी ) : तोंडोळी येथील सेवानगर तांडा मधील जिल्हा परिषद प्राथमिक शाळेत महाराष्ट्राचे आराध्य दैवत छत्रपती शिवाजी महाराज यांची जयंती मोठ्या उत्साहात साजरी करण्यात आली.
या कार्यक्रमाच्या सुरुवातीला शाळेचे मुख्याध्यापक गोल्हार सर, दादा दौंड सर यांच्या हस्ते शिवरायांच्या प्रतिमेचे विधिवत पूजन करून पुष्पहार अर्पण करण्यात आला. यावेळी सर्वांनी शिवरायांना मानाचा मुजरा करत अभिवादन केले. उपस्थित शिक्षक आणि मान्यवरांनी शिवरायांच्या रयतेच्या राज्याबद्दल आणि त्यांच्या शौर्याबद्दल विचार मांडून सर्वांना प्रेरित केले.
या प्रेरणादायी सोहळ्यासाठी परिसरातील अनेक मान्यवर आवर्जून उपस्थित होते. विशेषतः अनिल वरुंगुळे, गोरक्ष राठोड, आसाराम चव्हाण आणि संतोष चव्हाण या प्रमुख ग्रामस्थांनी उपस्थित राहून कार्यक्रमाची शोभा वाढवली. त्यांच्यासह इतर अनेक ग्रामस्थ आणि गावकऱ्यांनीही या कार्यक्रमात मोठ्या संख्येने सहभाग नोंदवला.
छत्रपती शिवाजी महाराज की जय च्या जयघोषाने संपूर्ण शाळा आणि सेवानगर तांडा परिसर दुमदुमून गेला होता. अत्यंत शिस्तबद्ध आणि उत्साहपूर्ण वातावरणात या शिवजयंती सोहळ्याची सांगता झाली.
