Times of Maharashtra Desk, Pune: कल्याणी नगर परिसरात पब्स, बार्स आणि रूफटॉप्सकडून अनेक वर्षांपासून सुरू असलेल्या नियमभंगावर कठोर कारवाई होत नसल्याच्या निषेधार्थ वडगावशेरी ब्लॉक काँग्रेस कमिटीच्या वतीने परिसरातील नागरिकांनी आज गोल्ड अडलेब चौक, कल्याणी नगर येथे तीव्र आंदोलन केले.
वडगावशेरी ब्लॉक काँग्रेसचे उपाध्यक्ष सचिन भोसले यांच्या नेतृत्वाखाली झालेल्या या आंदोलनात नागरिकांनी मोठ्या संख्येने उपस्थिती लावत पुणे महानगरपालिका आणि दारू परवाना विभागाला थेट आणि कठोर प्रश्नांची सरबत्ती केली.
डोळ्यावर पट्टी बांधून निषेध
आंदोलनादरम्यान नागरिकांनी आपल्या डोळ्यावर पट्टी बांधून एक प्रतीकात्मक निषेध केला. या कृतीतून नागरिकांच्या समस्यांकडे प्रशासनाने जाणूनबुजून दुर्लक्ष केले असल्याचे तीव्र भाष्य करण्यात आले. विशेषतः, पोर्शे अपघात प्रकरणानंतर प्रशासनाने नियमन आणि कारवाईची जी आश्वासने दिली होती, ती आजही अंमलात न आल्याने नागरिकांमध्ये तीव्र रोष दिसून आला.
नागरिकांनी उपस्थित केलेले प्रश्न
कल्याणी नगरसारख्या निवासी भागात मद्यविक्रीचे परवाने नेमके कोणत्या आधारावर दिले गेले?
बेकायदेशीर पब्स व रूफटॉप्सना त्यांचा विस्तार करण्याची आणि मुक्तपणे चालू राहण्याची मुभा का देण्यात आली?
परवान्याच्या वेळेपलीकडे आणि परवाना क्षेत्राबाहेर मद्यविक्री कशी आणि कोणाच्या दुर्लक्षाने चालू राहिली?
नागरिकांच्या वारंवार दाखल झालेल्या तक्रारींकडे जाणूनबुजून दुर्लक्ष कोणी केले?
पोर्शे प्रकरणानंतर दिलेली आश्वासने आजपर्यंत प्रत्यक्षात का उतरली नाहीत?
परवान्याच्या अटींची अंमलबजावणी न करणाऱ्या अधिकाऱ्यांवर कारवाई कधी होणार?
आणखी किती गंभीर घटना घडल्यावर प्रशासनाला कारवाई करावीशी वाटेल?
