Times of Maharashtra Desk, Pune : कोंढवा पोलीस ठाण्यात कार्यरत असलेल्या एका पोलीस हवालदारावर त्याच्या पत्नीवर अनैसर्गिक अत्याचार व छळ केल्याचा गुन्हा नोंदवण्यात आला आहे. पीडित महिला पेशाने शिक्षिका आहे. तिने हे गंभीर आरोप केले आहेत. पीडित पत्नीच्या फिर्यादीवरून लोणी काळभोर पोलीस ठाण्यात आरोपी हवालदार, तिची सासू, दीर आणि जाऊ अशा सासरच्या चार जणांविरोधात गुन्हा दाखल करण्यात आला आहे.
हा धक्कादायक प्रकार २०१४ ते २०२४ या दहा वर्षांच्या कालावधीत हवेली तालुक्यातील कदमवाकवस्ती येथे घडत होता. पीडितेच्या म्हणण्यानुसार, १२ वर्षांपूर्वी लग्न झाल्यानंतर आरोपी पतीने तिच्यावर अनेकवेळा, तिच्या इच्छेविरुद्ध जबरदस्तीने अनैसर्गिक अत्याचार केले, तसेच घरगुती वादातून सासरच्या मंडळींकडून तिला सातत्याने शारीरिक आणि मानसिक त्रास दिला गेला. इतकेच नव्हे तर, पीडिता गरोदर असताना पतीसह सासरच्या लोकांनी संगनमत करून तिचा जबरदस्तीने गर्भपात केल्याचा गंभीर आरोपही फिर्यादीत नमूद आहे. हवालदार पतीने “तु माझं घर सोड, नाहीतर तुला आणि मुलाला संपवीन” अशी जीवे मारण्याची धमकी दिल्याचेही फिर्यादीत म्हटले आहे.
लोणी काळभोर पोलिसांनी या गंभीर प्रकरणात भारतीय दंड संहितेच्या कलम ४९८(अ), ३००, ३१३, ३२३, ५०४, ५०६, ३४ नुसार गुन्हा दाखल केला असून, लोणी काळभोर पोलिस ठाण्याचे सहाय्यक पोलीस निरीक्षक सोमनाथ नाळे अधिक तपास करत आहेत.
