Times of Maharashtra Desk: पुणे महानगरपालिकेच्या आगामी निवडणुकीत प्रभाग क्रमांक 24 मध्ये पुन्हा एकदा राजकीय चुरस पाहायला मिळणार आहे. 2017 च्या महापालिका निवडणुकीत शिवसेनेचे रवींद्र धंगेकर यांनी भाजपचे गणेश बीडकर यांचा पराभव केला होता. यंदा मात्र ही लढत वेगळ्या स्वरूपात रंगणार असून, रवींद्र धंगेकरांचे पुत्र प्रणव धंगेकर मैदानात उतरले आहेत.
भाजपकडून गणेश बीडकर, शिवसेनेकडून प्रणव धंगेकर आणि अजित पवार गटाच्या राष्ट्रवादी काँग्रेसकडून गणेश नवथरे हे तीन प्रमुख उमेदवार रिंगणात असल्याने या प्रभागात यावेळी तिरंगी लढत होणार आहे. त्यामुळे मतांचे विभाजन होऊन शिवसेनेच्या उमेदवाराला फटका बसण्याची शक्यता राजकीय वर्तुळात व्यक्त केली जात आहे.या प्रभागात भाजप–शिवसेना युती तुटल्याच्या चर्चांना उधाण आले आहे. गणेश बीडकर यांची उमेदवारी भाजपकडून आधीच निश्चित होती. तर प्रणव धंगेकर यांनाही याच प्रभागातून उमेदवारी मिळावी यासाठी प्रयत्न सुरू होते. मात्र युतीत तोडगा न निघाल्याने भाजप आणि शिवसेना स्वतंत्रपणे निवडणूक लढवत असल्याचे चित्र आहे.
दरम्यान, अजित पवार यांच्या राष्ट्रवादी काँग्रेसने या प्रभागात मजबूत उमेदवार देण्याची रणनीती आखली होती. ग्राऊंड लेव्हलवरील कामगिरी आणि स्थानिक जनसंपर्क लक्षात घेऊन गणेश नवथरे यांना उमेदवारी देण्यात आली आहे. कसबा गणपती, कमला नेहरू रुग्णालय आणि K.E.M. हॉस्पिटल परिसराचा समावेश असलेल्या या प्रभागात नवथरे यांचे सामाजिक कार्य आणि ओळख भक्कम असल्याचे सांगितले जाते.विशेष म्हणजे, गणेश नवथरे हे रवींद्र धंगेकर यांचे पूर्वीचे निकटवर्तीय मानले जातात. धंगेकर यांनी लढवलेल्या मागील निवडणुकांमध्ये नवथरे सक्रियपणे सहभागी होते आणि संघटनात्मक काम पाहत होते. त्यामुळे आता भाजपपेक्षा नवथरे यांच्या उमेदवारीमुळेच प्रणव धंगेकर यांना अधिक आव्हान निर्माण होऊ शकते, अशी चर्चा आहे. तिन्ही उमेदवारांची ताकद, स्थानिक समीकरणे आणि मतांचे विभाजन यामुळे प्रभाग क्रमांक 24 मधील ही निवडणूक अत्यंत चुरशीची ठरण्याची चिन्हे आहेत.
