Times of Maharastra Desk, Pune Election Update : आगामी पुणे महानगरपालिका निवडणुकीसाठी येत्या ११ नोव्हेंबरला आरक्षण सोडत जाहीर होणार आहे. या जाहीर झालेल्या आरक्षण सोडतीवर २४ नोव्हेंबर पर्यंत हरकती व सूचना नोंदवता येतील असे निवडणूक आयोगाने सांगितले आहे. २ डिसेंबर रोजी अंतिम आरक्षण सोडत जाहीर होईल.त्यामुळे सध्या कोणत्या विभागातून कोण उभे राहणार यासाठी पुणेकरांमध्ये उत्सुकता पाहायला मिळत आहे.
पुणे महानगरपालिकेत सध्या एकूण ४१ प्रभाग आहेत आणि नगरसेवकांची संख्या १६५ आहे. त्यापैकी ४० प्रभाग हे ४ सदस्यांचे तर ३८ वा प्रभाग म्हणजे आंबेगाव – कात्रज हा ५ सदस्यांचा आहे. १६५ नागसेवकांच्या जागांपैकी ५०% जागा स्त्रियांसाठी आरक्षित आहेत . त्यामुळे या वर्षी ५०% नगरसेविका पुण्यामध्ये कार्यरत असणार आहेत. या मध्ये अनुसूचित जातीसाठी (SC) २२ तर अनुसूचित जमातींसाठी (ST) २ जागा राखीव तर ओबीसी साठी ४४ जागा राखीव आहेत.
या आरक्षण सोडतीसाठी राज्य निवडणूक आयोगाने नियमावली जाहीर केली असून या नियमावली नुसार आधी अनुसुतीचीत जाती , जमाती आणि त्या नंतर ओबीसी साठी आरक्षण काढले जाणार आहे. तर एक आरक्षण असणाऱ्या ठिकाणी चक्रकार पद्धतीने आरक्षण असणार आहे. चक्रकार पद्धतीने आरक्षण म्हणजे समांतर आरक्षण पद्धती.ज्यामध्ये आरक्षणाचे वितरण एका विशिष्ट सामाजिक आरक्षण प्रवर्गातून (उदा. महिलांसाठी, दिव्यांगांसाठी) खुल्या प्रवर्गासह इतर प्रवर्गांमध्येही होते. यामुळे आरक्षणाचा लाभ एकाच गटातील लोकांना न मिळता तो योग्य प्रकारे विभागला जातो. त्यामुळे आता कोणत्या विभागातून कोण उभे राहणार याकडे पुणेकरांचे लक्ष लागले आहे.
