Times of Maharashtra desk, Pune: दिल्लीतील लाल किल्ला परिसरात झालेल्या संशयास्पद स्फोट प्रकरणी सुरक्षा यंत्रणांनी मोठी कारवाई केली असून, या कटामागील धक्कादायक माहिती समोर आली आहे. या प्रकरणी दिल्ली पोलिसांच्या स्पेशल सेल आणि राष्ट्रीय तपास संस्थेने वेगाने तपास करत काश्मीरमधून एका व्यक्तीला अटक केली आहे. ज्या गाडीचा वापर करून हा स्फोट घडवून आणला गेला तिचा मूळ मालक खालिद असल्याचे निष्पन्न झाले असून त्याला काश्मीरमधून ताब्यात घेण्यात आले आहे. या कटाचा मुख्य सूत्रधार अल कायदा इन इंडियन सबकॉन्टिनेंट या दहशतवादी संघटनेचा म्होरक्या डॉ. उमर-उन-नबी असल्याचे तपासात उघड झाले आहे.
या दहशतवादी कटात अत्यंत घातक आणि नवीन पद्धतींचा वापर करण्याचे नियोजन होते. तपासात समोर आलेल्या माहितीनुसार, दहशतवाद्यांनी शू-बॉम्ब म्हणजेच बुटांमध्ये आयईडी लपवून स्फोट घडवण्याचा प्रयत्न केला होता. विशेष म्हणजे, इस्रायलवर हमासने ज्याप्रमाणे ड्रोन आणि रॉकेटने अचानक हल्ले केले होते तशाच पद्धतीचा हमास स्टाईल हल्ला दिल्लीत करण्याची यांची योजना होती. ड्रोनच्या माध्यमातून स्फोटके वाहून नेणे आणि गर्दीच्या ठिकाणी किंवा महत्त्वाच्या सरकारी इमारतींवर हवाई हल्ला करणे असे त्यांचे मनसुबे होते.
या कटाचा मास्टरमाईंड डॉ. उमर-उन-नबी याचा एक व्हिडिओ सध्या सोशल मीडियावर व्हायरल होत आहे. ज्याने खळबळ उडवून दिली आहे. या व्हिडिओमध्ये उमरने आत्मघातकी हल्ल्यांचे समर्थन केले असून त्याने याला चुकीच्या पद्धतीने समजली गेलेली संकल्पना असे म्हटले आहे. एक उच्चशिक्षित डॉक्टर असूनही त्याचे विचार अत्यंत कट्टर असल्याचे यातून दिसून येते. अटक केल्यानंतर उमरने पोलीस कोठडीत हाताची नस कापून आत्महत्येचा प्रयत्न केल्याचीही माहिती समोर आली आहे.
सुरक्षा यंत्रणांच्या मते, लाल किल्ल्याच्या मागील बाजूस झालेला हा स्फोट केवळ एक ट्रायल किंवा सुरक्षा यंत्रणांची चाचपणी करण्याचा प्रयत्न असू शकतो. दहशतवाद्यांचे हे नेटवर्क काश्मीरपासून दिल्लीपर्यंत पसरले असून त्यांनी राजधानीत मोठ्या प्रमाणावर जीवितहानी करण्याचे नियोजन केले होते.शू-बॉम्ब आणि ड्रोन हल्ल्यांसारखे आधुनिक तंत्रज्ञान वापरून हल्ला करण्याचा हा कट उधळून लावण्यात पोलिसांना यश आले असले तरी या प्रकरणात आणखी कोण सामील आहे का? याचा कसून तपास सध्या सुरू आहे.
