(प्रवीण चौधरी, परभणी प्रतिनिधी): मुंबई शहरातील कार्यक्षेत्रात १३ जानेवारी रोजी भिक्षेकरीविरोधी कारवाईदरम्यान एका अनोळखी महिलेचा शोध लागला. संबंधित पोलीस पथकाने तिला जे. जे. मार्ग पोलीस ठाण्यात आणून आवश्यक कायदेशीर प्रक्रिया पूर्ण केली. न्यायालयाच्या आदेशानुसार या महिलेला चेंबूर येथील शेल्टर होममध्ये दाखल करण्यात आले.
‘कोशिश’ची कोशिश सफल
‘कोशिश’ या स्वयंसेवी संस्थेच्या सहकार्याने महिलेच्या नातेवाईकांचा शोध सुरू करण्यात आला. तपासादरम्यान सदर महिला परभणी जिल्ह्यातील सेलू येथील असल्याची माहिती समोर आली. त्यानुसार ‘कोशिश’ संस्थेने सेलू पोलीस ठाण्याशी संपर्क साधला.
अत्यंत तुटपुंज्या माहितीच्या आधारे शोध
सेलू पोलीस ठाण्यातील पोलीस हवालदार शिवदास सूर्यवंशी यांनी अवघ्या १२ तासांत महिलेच्या नातेवाईकांचा शोध घेण्यात यश मिळविले. गोदावरी राऊत असे या महिलेचे नाव असून, त्या बारा वर्षांपूर्वी सीएसटी, मुंबई येथून बेपत्ता झाल्याची माहिती त्यांचे पुत्र किशोर राऊत यांनी दिली होती.
तपासाअंती शेल्टर होममध्ये असलेली महिला हीच बारा वर्षांपूर्वी हरवलेली गोदावरी राऊत असल्याचे निष्पन्न झाले. ही माहिती तत्काळ जे. जे. मार्ग पोलीस ठाण्यास कळविण्यात आली.
पोलीस हवालदार शिवदास सूर्यवंशी यांनी दाखविलेल्या समयसूचकता, कार्यतत्परता व जबाबदारीमुळे तब्बल बारा वर्षांनंतर संबंधित महिलेचा तिच्या कुटुंबीयांशी पुन्हा संपर्क प्रस्थापित झाला. या उल्लेखनीय कामगिरीची दखल घेत पोलीस उपायुक्त परिमंडळ एक डॉ. प्रवीण मुंडे यांनी पोलीस अधीक्षक रवींद्रसिंह परदेशी यांना पत्राद्वारे माहिती दिली आहे. त्यानुसार पोलीस अधीक्षक रवींद्रसिंह परदेशी यांच्यासह संपूर्ण जिल्हा पोलीस दलाकडून पोलीस हवालदार शिवदास सूर्यवंशी यांच्या कार्याचे विशेष कौतुक करण्यात येत आहे.
