दौंड (प्रतिनिधी संघराज गायकवाड, मयुर साळवे) – शहरातील बंगला साईड येथील जनता कॉलनी परिसरात भर दिवसा सुरू असलेल्या रस्त्याच्या कामात गंभीर निष्काळजीपणाचा बळी ठरत, रोड रोलरखाली सापडून एका कामगाराच्या पाच वर्षाच्या चिमुकल्याचा दुर्दैवी मृत्यू झाल्याची धक्कादायक घटना घडली आहे. सार्वजनिक सुरक्षेकडे दुर्लक्ष करून सुरू असलेल्या विकासकामांचे हे भयावह वास्तव असल्याची तीव्र प्रतिक्रिया नागरिकांकडून व्यक्त केली जात आहे.
प्रत्यक्षदर्शींनी सांगितले की, रस्त्याचे काम सुरू असताना कोणतेही सुरक्षा बॅरिकेड्स, सूचना फलक किंवा वॉचमन तैनात नव्हते. कामगारांची लहान मुले कामाच्या ठिकाणी वावरत असतानाही संबंधित ठेकेदार व कामावर देखरेख करणाऱ्या अधिकाऱ्यांनी सुरक्षेचे मूलभूत नियम धाब्यावर बसवले, आणि त्याचा परिणाम एका निष्पाप बालकाला जीव गमावून चुकवावा लागला.
या घटनेनंतर संपूर्ण परिसरात संतापाचे वातावरण निर्माण झाले असून, दोषींवर कठोर कारवाईची मागणी होत आहे. मृत मुलाला सरकारी रुग्णालयात शवविच्छेदनासाठी दाखल करण्यात आले असून, पोलिसांकडून पुढील कारवाई सुरू आहे.
दरम्यान, या घटनेच्या पार्श्वभूमीवर दौंड शहरातील आणखी एक गंभीर बाब समोर येत आहे. ती म्हणजे काही काही भागांमध्ये रात्री १२ नंतरही रस्त्याची कामे सुरू ठेवली जात असल्याचा आरोप नागरिकांकडून केला जात आहे. रात्रीच्या वेळी अपुरी प्रकाशव्यवस्था, सुरक्षा बॅरिकेड्सचा अभाव आणि शासकीय अधिकाऱ्यांची अनुपस्थिती यामुळे अपघात होण्याचा धोका अधिक वाढत असल्याचे नागरिकांचे म्हणणे आहे.
नागरिकांनी दोषी ठेकेदार, संबंधित अभियंते व जबाबदार अधिकाऱ्यांवर तात्काळ कारवाई करावी, रात्री उशिरा सुरू असलेल्या रस्त्याच्या कामांची सखोल चौकशी करावी, तसेच पीडित कुटुंबाला तात्काळ आर्थिक मदत जाहीर करावी, अशी जोरदार मागणी केली आहे.
