रुपेश देशमुख (ब्रह्मपुरी प्रतिनिधी ) : संत हे अनंत असतात. जगातील आघात सोसत समाजाला योग्य दिशा देण्याचे कार्य करणाऱ्यांनाच खरे संत म्हणतात. अशा संतांमध्ये संत गाडगेबाबा हे एकमेव “बाबांचे बाबा” होते. त्यांनी झाडूला शस्त्र मानत स्वच्छतेचा संदेश दिला, भोंदू बाबांचा पर्दाफाश केला आणि कीर्तनाच्या माध्यमातून शिक्षणाचे महत्त्व व माणसाच्या कर्माची जाणीव समाजात रुजवली. त्यामुळे खरा “झाडूचा राजा” आणि “बाबांचे बाबा” म्हणजे संत गाडगेबाबा होत, असे मार्मिक आणि काव्यमय विवेचन प्रसिद्ध कवी व लेखक डॉ. धनराज खानोरकर यांनी केले.
ते ब्रह्मपुरी येथील नेवजाबाई हितकारिणी महाविद्यालयात आयोजित ‘संत गाडगेबाबा : व्यक्ती आणि विचार’ या विषयावरील व्याख्यानात बोलत होते. कार्यक्रमाला विद्यार्थ्यांची मोठी उपस्थिती होती.
कार्यक्रमाच्या अध्यक्षस्थानी महाविद्यालयाचे प्राचार्य डॉ. सुभाष शेकोकर होते, तर प्रमुख अतिथी म्हणून डॉ. युवराज मेश्राम उपस्थित होते. आपल्या अध्यक्षीय भाषणात प्राचार्य डॉ. शेकोकर यांनी संत गाडगेबाबांच्या कार्याचा गौरव करताना सांगितले की, गाडगेबाबांनी समाजाला स्वच्छतेचे, पर्यावरण संवर्धनाचे आणि शिक्षणाचे महत्त्व पटवून दिले. मानवी स्वच्छता आणि पर्यावरण स्वच्छता यांचा संदेश त्यांनी कृतीतून दिला, हे आजच्या पिढीसाठी प्रेरणादायी आहे.
डॉ. खानोरकर यांनी आपल्या व्याख्यानात गाडगेबाबांच्या जीवनातील विविध प्रसंग सांगत त्यांच्या समाजप्रबोधनाच्या कार्याचा वेध घेतला. कीर्तनाच्या माध्यमातून त्यांनी अंधश्रद्धा, भोंदूगिरी आणि सामाजिक कुरीतींवर कठोर प्रहार करत लोकांना जागृत केले, असेही त्यांनी नमूद केले.
कार्यक्रमाचे संचालन व आभार प्रदर्शन जगदिश गुरनुले यांनी केले. या कार्यक्रमाला महाविद्यालयातील प्राध्यापक, कर्मचारी आणि मोठ्या संख्येने विद्यार्थी उपस्थित होते.
