Times Of Maharashtra Desk : नागपूर येथे राज्यातील अन्न सुरक्षा योजनेअंतर्गत सुरू असलेल्या शिवभोजन थाळी केंद्रांच्या चालकांनी थकीत बिलांच्या प्रश्नावर तीव्र आंदोलन छेडले. राज्याचे मंत्री चंद्रशेखर बावनकुळे यांच्या उपस्थितीतच चालकांनी जोरदार घोषणाबाजी करत आपली नाराजी व्यक्त केली. गेल्या चार ते सहा महिन्यांपासून अनुदान आणि बिलांची रक्कम प्रलंबित असल्याने केंद्र चालक आर्थिक अडचणीत सापडल्याचे त्यांनी सांगितले.
आंदोलकांनी मंत्री बावनकुळे यांना निवेदन सादर करत तातडीने थकीत रक्कम मंजूर करण्याची मागणी केली. आम्ही सामाजिक बांधिलकी म्हणून ही योजना प्रामाणिकपणे राबवत आहोत; मात्र शासनाकडून वेळेवर निधी न मिळाल्याने केंद्र चालवणे कठीण झाले आहे, अशी भावना अनेक चालकांनी व्यक्त केली. काही ठिकाणी घोषणाबाजीदरम्यान पोलिस आणि आंदोलकांमध्ये किरकोळ झटापट झाल्याचेही पाहायला मिळाले. परिस्थिती नियंत्रणात ठेवण्यासाठी पोलिसांनी तत्काळ हस्तक्षेप केला.
दरम्यान, मंत्री बावनकुळे यांनी आंदोलनकर्त्यांचे म्हणणे शांतपणे ऐकून घेतले आणि हा प्रश्न प्राधान्याने सोडवण्याचे आश्वासन दिले. त्यांनी सांगितले की, ते तातडीने मुख्यमंत्री आणि संबंधित मंत्री छगन भुजबळ यांच्याशी चर्चा करून निधी उपलब्ध करून देतील. शिवभोजन योजना ही गरजूंसाठी महत्त्वाची योजना आहे. केंद्र चालकांना अडचणीत ठेवून योजना सुरळीत चालू शकत नाही. त्यामुळे थकीत रक्कम लवकरात लवकर देण्यासाठी आम्ही आवश्यक ती पावले उचलू, असे त्यांनी स्पष्ट केले.
या आंदोलनामुळे शिवभोजन योजनेतील निधी वितरणाचा प्रश्न पुन्हा एकदा चर्चेत आला असून, शासनाने लवकर निर्णय घ्यावा, अशी मागणी होत आहे.
