शिरपूर (प्रतिनिधी तुषार शेटे) :किसान विद्या प्रसारक संस्था, शिरपूर यांच्या वतीने आयोजित करण्यात आलेल्या उन्हाळी क्रीडा व कला प्रशिक्षण शिबिर २०२६ चा उद्घाटन सोहळा उत्साहपूर्ण वातावरणात पार पडला. या शिबिराच्या माध्यमातून परिसरातील विद्यार्थ्यांमध्ये क्रीडा व कला क्षेत्राविषयी नवचैतन्य निर्माण झाले आहे.
या शिबिरात सकाळ व दुपार अशा दोन सत्रांमध्ये क्रिकेट, फुटबॉल, बास्केटबॉल, व्हॉलीबॉल, कबड्डी, खो-खो, बॅडमिंटन, स्केटिंग, बॉक्सिंग, बुद्धिबळ व कॅरम यांसारख्या क्रीडा प्रकारांसह चित्रकला, संगीत, नृत्य आदी कलाक्षेत्रातील प्रशिक्षण तज्ञ प्रशिक्षकांकडून दिले जाणार आहे.
याशिवाय विद्यार्थ्यांच्या सर्वांगीण विकासासाठी ट्रेकिंग, वॉकिंग, मॅजिक शो, वॉटर पार्क ट्रिप, चित्रकला स्पर्धा व विविध विषयांवरील व्याख्यानांचे आयोजन करण्यात आले आहे. सहभागी विद्यार्थ्यांना मोफत क्रीडा गणवेश तसेच दिवसातून दोन वेळा पोषक आहाराची सोय करण्यात आली आहे.
कार्यक्रमाच्या अध्यक्षस्थानी संस्थेचे अध्यक्ष डॉ. तुषार रंधे उपस्थित होते. यावेळी सचिव निशांत रंधे, खजिनदार आशाताई रंधे, संचालिका सीमाताई रंधे, उपनगराध्यक्षा संगीताताई देवरे यांच्यासह विविध मान्यवर, शिक्षक, पालक आणि मोठ्या संख्येने विद्यार्थी उपस्थित होते.
कार्यक्रमाचे सूत्रसंचालन प्रा. राकेश बोरसे यांनी केले, तर आभार प्रदर्शन हेमंत शिरसाठ यांनी मानले. शिबिराच्या यशस्वीतेसाठी क्रीडा व कला विभागातील शिक्षकांनी विशेष परिश्रम घेतले.
या उपक्रमामुळे ग्रामीण व शहरी भागातील विद्यार्थ्यांना दर्जेदार प्रशिक्षणाची संधी मिळून त्यांच्या सर्वांगीण विकासाला चालना मिळणार असल्याचे मत उपस्थितांनी व्यक्त केले.
