28 फेब्रुवारीपर्यंत अर्ज सादर करण्याचे आवाहन
यवतमाळ प्रतिनिधी : सामाजिक न्याय व विशेष सहाय्य विभागामार्फत अनुसूचित जातीतील चर्मकार समाजासाठी राबविण्यात येणाऱ्या ‘गटई स्टॉल योजना’ अंतर्गत सन 2025-26 या वर्षासाठी अर्ज मागविण्यात आले आहेत. चर्मकार, ढोर, होलार, मोची आदी समाजघटकांचे आर्थिक, शैक्षणिक व सामाजिक जीवनमान उंचावून त्यांना समाजाच्या मुख्य प्रवाहात आणण्याच्या उद्देशाने ही योजना सन 1997 पासून कार्यान्वित आहे.
या योजनेंतर्गत महानगरपालिका, नगरपालिका, छावणी क्षेत्र तसेच ग्रामपंचायत क्षेत्रातील पात्र गटई कामगारांना 100 टक्के शासकीय अनुदानावर लोखंडी पत्र्याचे स्टॉल देण्यात येणार असून त्यासोबतच ५ हजार रुपयांचे रोख अनुदानही प्रदान करण्यात येणार आहे.
पात्रतेच्या अटी पुढीलप्रमाणे :
अर्जदार हा महाराष्ट्र राज्याचा रहिवासी व अनुसूचित जातीचा असावा.
ग्रामीण भागातील अर्जदाराचे वार्षिक उत्पन्न 80 हजार रुपयांपर्यंत, तर शहरी भागातील उत्पन्न एक लाख रुपयांपर्यंत असावे.
अर्जदाराचे वय किमान 18 वर्षे पूर्ण असावे.
ज्या जागेसाठी स्टॉलची मागणी केली आहे ती जागा ग्रामपंचायत, नगरपालिका, महानगरपालिका किंवा छावणी बोर्डाकडून अधिकृतरित्या भाडे, करार, खरेदी किंवा मोफत ताब्यात दिलेली अथवा अर्जदाराच्या स्वमालकीची असणे आवश्यक आहे.
जिल्ह्यातील पात्र व गरजू गटई कामगारांनी सहाय्यक आयुक्त, समाज कल्याण कार्यालय, पळसवाडी कॅम्प, यवतमाळ येथून अर्ज विनामूल्य प्राप्त करून आवश्यक कागदपत्रांसह 28 फेब्रुवारीपर्यंत सादर करावेत, असे आवाहन सहाय्यक आयुक्त मंगला मून यांनी केले आहे.
ही योजना गरजू कामगारांसाठी आर्थिक स्वावलंबनाची मोठी संधी ठरणार असल्याचे प्रशासनाने नमूद केले आहे.
