Times of Maharashtra Desk, Pune : वडगावशेरी परिसरातील बेकायदेशीर होर्डिंगप्रकरणी टाईम्स ऑफ महाराष्ट्रने १६ डिसेंबर २०२५ रोजी सविस्तर बातमी प्रसिद्ध केली होती. त्या बातमीनंतर महापालिकेने संबंधित 40×20 आकाराचे होर्डिंग हटवण्याची कारवाई केली; मात्र आजतागायत त्या होर्डिंगचा मुख्य लोखंडी आधारस्तंभ (पोल) तसाच उभा असल्याने नागरिकांच्या सुरक्षेचा प्रश्न पुन्हा ऐरणीवर आला आहे.
सर्वे क्र. 46/6, मौजे वडगावशेरी येथील या बेकायदेशीर होर्डिंगबाबत माजी नगरसेवकांनी 15 एप्रिल 2025 रोजी तक्रार दाखल केली होती. तब्बल 120 दिवस कोणतीही कारवाई न झाल्याने प्रशासनावर टीका झाली. माध्यमांनी आवाज उठवल्यानंतर होर्डिंग हटवण्यात आले, पण अर्धवट अवस्थेतील गंजलेला पोल मात्र तिथेच सोडण्यात आला आहे.
अपघाताची वाट पाहताय का? – नागरिकांचा सवाल
स्थानिक रहिवाशांच्या मते,
- पोल गंजलेला असून त्याची स्थिती धोकादायक आहे.
- जोरदार वारा, पावसाळी परिस्थिती किंवा तांत्रिक बिघाड झाल्यास तो कधीही कोसळू शकतो.
- परिसरातून मोठ्या प्रमाणात वाहतूक होते; लहान मुले, ज्येष्ठ नागरिक आणि पादचारी यांची सतत वर्दळ असते.
यापूर्वी महापालिकेने ही जागा अतिक्रमण म्हणून रिकामी केली होती. त्याच ठिकाणी उभारलेल्या बेकायदेशीर होर्डिंगवर मोठ्या संघर्षानंतर कारवाई झाली, पण पूर्णपणे धोका दूर करण्याऐवजी पोल अर्धवट सोडून देणे हे प्रशासनाचे निष्काळजीपणाच दर्शवते, अशी संतप्त प्रतिक्रिया स्थानिकांनी दिली.
संवेदनशील परिसरात दुर्लक्ष?
या ठिकाणापासून काही अंतरावरच 9 BRD Air Station असल्याने सुरक्षेच्या दृष्टीनेही हा मुद्दा अत्यंत संवेदनशील आहे. अशा भागात कोणतेही अनधिकृत, धोकादायक स्ट्रक्चर कायम ठेवणे हे नियमबाह्य असून गंभीर सुरक्षाधोका निर्माण करणारे आहे, असे जाणकारांचे मत आहे.
प्रशासनाला थेट इशारा
महापालिकेने तातडीने उर्वरित पोल हटवून संभाव्य अपघात टाळावा. भविष्यात कोणतीही दुर्घटना घडल्यास त्याची सर्वस्वी जबाबदारी प्रशासनावरच राहील, असा इशारा स्थानिक नागरिकांनी दिला आहे.
वडगावशेरीतील हे प्रकरण पुन्हा एकदा महापालिकेच्या कार्यपद्धतीवर प्रश्नचिन्ह उपस्थित करत आहे. अखेर प्रशासन पूर्ण आणि जबाबदारीने कारवाई करणार की अपघाताची वाट पाहणार?
आता संपूर्ण वडगावशेरीचे लक्ष महापालिकेच्या पुढील पावलाकडे लागले आहे.
