संघराज गायकवाड, राहुल आढाव ( दौंड प्रतिनिधी ) : नगरपालिका हद्दीतील ज्येष्ठ नागरिक विरंगुळा केंद्राच्या परिसरात सध्या मोठ्या प्रमाणावर खोदकाम सुरू असल्याचे चित्र आहे. मात्र या कामासंदर्भात कोणताही अधिकृत कामाचा फलक, मंजुरी आदेश, संबंधित विभागाची माहिती किंवा निधी कोणत्या योजनेतून उपलब्ध झाला आहे, याबाबतची कोणतीही माहिती घटनास्थळी लावण्यात आलेली नाही. त्यामुळे हे काम अधिकृत आहे की अनधिकृत, याबाबत नागरिकांमध्ये तीव्र संभ्रम आणि नाराजी व्यक्त केली जात आहे.
कामाचा फलकच नाही, माहिती पूर्णपणे गायब
नगरपालिका हद्दीत सुरू होणाऱ्या कोणत्याही विकासकामासाठी नियमाप्रमाणे कामाचा फलक लावणे, मंजुरीचा आदेश, कामाचा अंदाजपत्रक, निधीचा स्त्रोत व संबंधित अधिकाऱ्यांची नावे स्पष्टपणे नमूद करणे आवश्यक असते. मात्र सदर विरंगुळा केंद्र परिसरात सुरू असलेल्या खोदकामाबाबत अशी कोणतीही अधिकृत माहिती उपलब्ध नसल्याने नियमांचे उल्लंघन होत असल्याचा आरोप स्थानिक नागरिकांकडून केला जात आहे.
झाडे व पर्यावरण धोक्यात
सदर परिसरात मोठ्या प्रमाणात झाडे असून, त्याठिकाणी सुरू असलेल्या खोदकामामुळे पर्यावरणाला धोका निर्माण होत आहे. झाडांच्या मुळांना इजा होण्याची शक्यता असून, भविष्यात ही झाडे कोसळण्याचा धोका देखील नाकारता येत नाही. पर्यावरण संवर्धनाच्या घोषणा करणाऱ्या प्रशासनाकडून अशा प्रकारच्या कामांकडे दुर्लक्ष केले जात असल्याने नागरिकांमध्ये संताप व्यक्त केला जात आहे.
जागेच्या मालकी हक्कावर प्रश्नचिन्ह
ही जागा नेमकी शासनाच्या मालकीची आहे की खासगी मालकी हक्काची, याबाबत अद्याप कोणतीही अधिकृत माहिती समोर आलेली नाही. तसेच तथाकथित ज्येष्ठ नागरिक विरंगुळा केंद्र खरोखर सार्वजनिक स्वरूपाचे आहे की खासगी उपक्रमासाठी वापरले जात आहे, यावरही संशय व्यक्त केला जात आहे. जर ही जागा शासकीय असेल, तर त्यावर कोणाच्या आदेशाने व कोणत्या अधिकाराने काम सुरू करण्यात आले, हा प्रश्न उपस्थित होत आहे.
निधी व आदेश कोणाचे?
या कामासाठी निधी कोण देणार आहे, कोणत्या योजनेतून हा निधी मंजूर करण्यात आला आहे, तसेच कोणत्या अधिकाऱ्याच्या आदेशाने हे काम सुरू झाले आहे, याबाबतही कोणतीही अधिकृत माहिती समोर आलेली नाही. त्यामुळे कामामागे नेमका उद्देश काय, हा प्रश्न नागरिकांकडून विचारला जात आहे.
मूलभूत सुविधांकडे दुर्लक्ष?
विशेष म्हणजे, याच प्रभागातील अनेक भागांमध्ये आजही रस्त्यांची दयनीय अवस्था, बंद अवस्थेतील रोड लाईट, अनियमित पाणीपुरवठा अशा मूलभूत समस्या कायम आहेत. अत्यावश्यक विकासकामे प्रलंबित असताना, केवळ काही ठराविक ज्येष्ठ नागरिकांसाठी आणि त्यातही शासकीय जागेवर अशा प्रकारचे काम कोणाच्या सांगण्यावरून व इतक्या घाईने का सुरू करण्यात आले, असा थेट सवाल स्थानिक नागरिक उपस्थित करत आहेत.
चौकशीची मागणी
सदर प्रकरणी दौंड नगरपालिकेने तातडीने हस्तक्षेप करावा, या कामाची वैधता तपासावी, कामास मंजुरी आहे की नाही, निधीचा स्त्रोत कोणता आहे, जागेचा मालकी हक्क कोणाचा आहे आणि संबंधित जबाबदार अधिकारी कोण आहेत, याची सविस्तर व लेखी माहिती नागरिकांसमोर मांडावी, अशी जोरदार मागणी स्थानिक नागरिकांकडून होत आहे.
जर हे काम अनधिकृत असल्याचे निष्पन्न झाले, तर तात्काळ काम थांबवून संबंधितांवर कारवाई करण्यात यावी, अशीही मागणी नागरिकांनी केली आहे.
