विनोद पवार (जळगाव प्रतिनिधी ) : शहरातील पोलिस दलाच्या दक्षता पेट्रोल पंपावरील इंधन विक्रीतून आलेल्या रकमेचा सुमारे १ कोटी ३३ लाख रुपयांचा अपहार केल्याच्या प्रकरणात पोलिस उपनिरीक्षक वाल्मिक वाघ यांना अटक करण्यात आली आहे. या प्रकरणात त्यांच्या मुलालाही पोलिसांनी ताब्यात घेतले असून या घटनेमुळे जिल्ह्यात मोठी खळबळ उडाली आहे.
मिळालेल्या माहितीनुसार, पोलिस दलाच्या दक्षता पेट्रोल पंपावरील दैनंदिन आर्थिक व्यवहारांची जबाबदारी व्यवस्थापक म्हणून वाल्मिक वाघ यांच्याकडे होती. दरम्यान, इंधन विक्रीतून जमा झालेल्या रकमेतील मोठ्या प्रमाणावर अपहार झाल्याची बाब समोर आल्यानंतर चौकशी सुरू करण्यात आली.
प्राथमिक तपासात तब्बल १ कोटी ३३ लाख रुपयांचा अपहार झाल्याचे उघड झाल्यानंतर पोलिसांनी फसवणुकीचा गुन्हा दाखल केला. यानंतर वाघ फरार झाले होते. पोलिसांनी त्यांच्या शोधासाठी विशेष पथके रवाना केली होती. अखेर १ मार्च रोजी वाघ यांनी स्थानिक गुन्हे शाखेत हजर होऊन शरणागती पत्करली.
पोलिस अधीक्षक डॉ. महेश्वर रेड्डी यांच्या मार्गदर्शनाखाली तपास अधिकारी राहुल गायकवाड यांनी पुढील चौकशी केली. तपासादरम्यान वाघ यांच्या मुलाच्या बँक खात्यातही अपहारातील रकमेचे व्यवहार झाल्याचा संशय व्यक्त होत असल्याने त्यालाही ताब्यात घेण्यात आले आहे. या प्रकरणाचा अधिक तपास पोलिसांकडून सुरू आहे.
