Times of Maharashtra Desk, Pune: कर्नाटकच्या मुख्यमंत्रिपदाच्या कथित सत्तासंघर्षाच्या चर्चांदरम्यान, मुख्यमंत्री सिद्धरामय्या आणि उपमुख्यमंत्री डी.के. शिवकुमार यांनी पुन्हा एकदा एकत्र येऊन काँग्रेस पक्षामध्ये एकजूट असल्याचे दर्शवले आहे. आज सकाळी झालेल्या भेटीनंतर या दोन्ही नेत्यांनी संयुक्त पत्रकार परिषद घेतली आणि या वादावर पडदा टाकण्याचा प्रयत्न केला.
दिल्लीला जाण्याची तयारी
पत्रकारांशी बोलताना सिद्धरामय्या यांनी स्पष्ट केले की, काँग्रेसच्या पक्षश्रेष्ठींनी, विशेषत: राहुल गांधी, सोनिया गांधी, प्रियंका गांधी किंवा पक्षाचे अध्यक्ष मल्लिकार्जुन खर्गे यांनी बोलावल्यास आम्ही दोघेही दिल्लीला जाण्यास तयार आहोत. पक्षश्रेष्ठी जो निर्णय घेतील तो आपल्याला मान्य असेल असे सिद्धरामय्या यांनी सांगितले.
कधी होणार शिवकुमार मुख्यमंत्री?
उपमुख्यमंत्रिपदावरून मुख्यमंत्री होण्याची चर्चा सुरू असलेल्या शिवकुमार यांच्याबाबत विचारले असता, सिद्धरामय्या म्हणाले, “जेव्हा हायकमांड सांगेल, तेव्हा”
सिद्धरामय्या यांनी सांगितले की कर्नाटकमधील सर्व आमदार एकजूट आहेत आणि आम्ही विरोधी पक्षाचा सामना एकत्र करू.राज्यात सिद्धरामय्या यांच्या अडीच वर्षांच्या कार्यकाळानंतर मुख्यमंत्रिपद बदलण्याच्या म्हणजेच रोटेशनल सीएम कराराची सातत्याने चर्चा सुरू आहे. या पार्श्वभूमीवर, सिद्धरामय्या आणि शिवकुमार यांनी एकत्र येऊन पक्षाचा निर्णय अंतिम असेल या भूमिकेवर शिक्कामोर्तब केले आहे.
