Times of Maharashtra Desk, Pune: पुणे शहरातील भवानी पेठ येथील मोटार स्टँड चौक ते विशाल सोसायटी दरम्यानचा सुमारे २५० मीटर लांब आणि ३५ फूट रुंद रस्ता बनवण्याच्या नावाखाली ह्याच वर्षात दुसऱ्यांदा खोदल्याचा गंभीर प्रकार समोर आला असून यामुळे येथे राहणाऱ्या नागरिकांना ये जा करताना मोठा त्रास सहन करावा लागत आहे. मात्र याकडे ना लोकप्रतिनिधींचं लक्ष आहे, ना महापालिकेचं लक्ष आहे. केवळ टेंडर चा माल मिळवण्यासाठी हा खटाटोप सुरू असल्याचे येथील स्थानिकांचे म्हणणे आहे.
लष्कर भागातील भवानी माता मंदिराजवळील मोटार स्टँड चौक ते चुडामण तालीम चौकातून थेट हडपसरकडे जाणारा २५० मीटर रस्ता पुणे महापालिकेने विकासकामांच्या नावाखाली गेल्या चार आठवड्यापूर्वी खोदला आहे, त्यामुळे हा संपूर्ण रस्ता मागील एक महिन्यापासून बंद आहे. या भागातील कुमार गॅलेक्सी, विशाल सोसायटी, अजमेरा सोसायटी, पद्मजी पॅराडाईझ ह्या सोसायटयांमध्ये राहणाऱ्या नागरिकांचे मोठे हाल झाले आहेत. या सोसायट्यांमध्ये व्यापारी वर्ग मोठ्या प्रमाणात वास्तव्यास आहे, त्यामुळे त्यांना दुचाकी, चारचाकी वाहने बाहेर काढणे अशक्य झाले आहे. तर दुसरीकडे गृहिणींना बाजारात जाणे, लहान मुलांना शाळेत जाण्यासाठी मोठी कसरत करावी लागत आहे.
भवानी पेठ मार्गावरील बससेवा ठप्प
मागील वीस दिवसांपासून या मार्गावरून ये जा करणाऱ्या महापालिकेच्या हडपसर, डेक्कन, कोथरूड, वारजे, न.ता वाडी ह्या बससेवेलाही मोठा फटका बसला असून, त्यामुळं येथून कामासाठी इतरत्र जाणारे नागरिक तसेच शाळा व महाविद्यालयात जाणाऱ्या विद्यार्थ्यांची मोठी गैरसोय झाली आहे.
वर्षातून दोनदा करोडो रुपयांचा चुराडा
वर्षभरापूर्वी ह्याच मार्गावर ड्रेनेज लाइन टाकण्याच्या कामासाठी रस्ता खोदला होता. हे काम सहा महिन्यातून अधिक काळ सुरू होते. त्यासाठी चार ते पाच कोटी रुपये निधी खर्च झाला होता. सहा महिन्यापूर्वीच काम केलेलं असताना, रस्ता पुन्हा खोदल्याने मागील पैसे तर वाया गेलेच मात्र आतादेखील करोडो रुपयांचा चुराडा झाला आहे, याला जबाबदार कोण असा प्रश्न नागरिक विचारत आहेत.
अधिकाऱ्यांचे मौन ?
सहा महिन्यापूर्वीच करोडो रुपये खर्च करून बांधण्यात असलेला रस्ता पुन्हा बांधत असताना अधिकारी वर्ग मात्र मौन बाळगून आहे. अभियंता, निरीक्षक, सहाय्यक आयुक्त, उपायुक्त टेंडर काढताना झोपेत सही करतात का? असा संतप्त सवाल नागरिक उपस्थित करत आहेत.
