Times of Maharashtra Desk : १८ डिसेंबर २०२५: पुणे महापालिका निवडणुकीसाठी भाजप आणि शिवसेना यांच्यात जागा वाटपाबाबत चर्चा सुरु आहे. मात्र, बैठकीत शिवसेनेकडून पुणे महानगरप्रमुख रवींद्र धंगेकर यांना आमंत्रण न दिल्याचे समोर आले आहे.गेल्या काही दिवसांपूर्वी रवींद्र धंगेकर यांनी पुण्यातील जैन बोर्डिंग प्रकरणात भाजपचे खासदार आणि केंद्रीय राज्यमंत्री मुरलीधर मोहोळ यांच्यावर टीका केली होती. या पार्श्वभूमीवर आजच्या बैठकीत त्यांना सहभागी होण्याची संधी दिली गेली नाही.
महायुतीची बैठक
भाजप-शिवसेना बैठकीला पुण्यातील रामी ग्रँड हॉटेलमध्ये सुरुवात झाली. बैठकीत मुरलीधर मोहोळ, चंद्रकांत पाटील, माधुरी मिसाळ, धीरज घाटे, निलम गोऱ्हे, विजय शिवतारे, नाना भानगिरे यांसह अन्य पक्षनेते उपस्थित होते. बैठकीत पुणे महापालिका निवडणुकीसाठी जागांचे वाटप आणि रणनीतीवर चर्चा केली जात आहे.शिवसेनेतर्फे 35-40 जागांसाठी भाजपकडे प्रस्ताव पाठविण्याची चर्चा असतानाही, रवींद्र धंगेकर 165 जागा लढवण्यावर ठाम असल्याचे समजते. त्यामुळे दोन्ही पक्षात स्थानिक स्तरावर तणावाचे वातावरण निर्माण झाले आहे.
रवींद्र धंगेकर यांचा राजकीय प्रवास
रवींद्र धंगेकर यांनी काँग्रेसच्या चिन्हावर कसबा विधानसभा पोटनिवडणुकीत विजय मिळवला होता. मात्र, 2024 च्या विधानसभा निवडणुकीत त्यांचा भाजपच्या हेमंत रासने यांच्याकडून पराभव झाला. नंतर ते काँग्रेस सोडून शिवसेनेत प्रवेश झाले. शिवसेनेत प्रवेशानंतर काही काळ शांत असले तरी, जैन बोर्डिंग प्रकरणात त्यांनी भाजपवर हल्लाबोल केला, ज्यामुळे आजच्या महायुतीच्या बैठकीत त्यांना डावलले असल्याचे मत व्यक्त केले जात आहे.याप्रकरणी स्थानिक राजकारणी आणि पक्षकार्यकर्त्यांमध्ये चर्चेचा जोर असून, आगामी महापालिका निवडणूक आणि जागा वाटपावर याचे परिणाम होऊ शकतात.
